ਪੀਟੀਸੀ ਨਿਊਜ਼ ਡੈਸਕ: ਪੰਜਾਬੀ ਦੁਨੀਆ ਭਰ ਵਿੱਚ ਆਪਣੀ ਮਿਹਨਤ, ਲਗਨ ਅਤੇ ਇਮਾਨਦਾਰੀ ਲਈ ਜਾਣੇ ਜਾਂਦੇ ਹਨ। ਅਜਿਹੀ ਹੀ ਮਿਸਾਲ ਆਸਟ੍ਰੇਲੀਆ ਵਿੱਚ ਸਿੱਖ ਟੈਕਸੀ ਡਰਾਈਵਰ ਨੇ ਵਿਖਾਈ ਹੈ, ਜੋ ਕਿ ਆਪਣੀ ਇਮਾਨਦਾਰੀ ਨਾਲ ਸੁਰਖੀਆਂ ਵਿੱਚ ਬਣਿਆ ਹੋਇਆ ਹੈ। ਟੈਕਸੀ ਡਰਾਈਵਰ ਚਰਨਜੀਤ ਸਿੰਘ 30 ਸਾਲਾਂ ਤੋਂ ਵੱਧ ਸਮੇਂ ਤੋਂ ਟੈਕਸੀ ਦਾ ਕੰਮ ਕਰਦਾ ਆ ਰਿਹਾ ਹੈ, ਜਿਸ ਦੀ ਇਮਾਨਦਾਰੀ ਦੀ ਤਾਜ਼ਾ ਮਿਸਾਲ ਉਸ ਸਮੇਂ ਸੁਰਖੀਆਂ ਵਿੱਚ ਆਈ ਜਦੋਂ ਉਸਨੇ ਇੱਕ ਯਾਤਰੀ ਨੂੰ ਲਗਭਗ 8,000 ਆਸਟ੍ਰੇਲੀਅਨ ਡਾਲਰ (ਲਗਭਗ 4.53 ਲੱਖ ਰੁਪਏ ਦੇ ਬਰਾਬਰ) ਦੀ ਰਕਮ ਵਾਪਸ ਕਰ ਦਿੱਤੀ। ਯਾਤਰੀ ਇਹ ਰਕਮ ਉਸ ਦੀ ਕਾਰ ਵਿੱਚ ਪਿਛਲੀ ਸੀਟ ‘ਤੇ ਭੁੱਲ ਗਿਆ ਸੀ।
ਨਿਊਜ਼ 9 ਮੈਲਬੌਰਨ ਨਾਲ ਇੱਕ ਇੰਟਰਵਿਊ ਵਿੱਚ ਚਰਨਜੀਤ ਸਿੰਘ ਅਟਵਾਲ ਨੇ ਦੱਸਿਆ ਕਿ ਯਾਤਰੀਆਂ ਦਾ ਆਪਣੀ ਟੈਕਸੀ ਵਿੱਚ ਸਮਾਨ ਭੁੱਲ ਜਾਣਾ ਕੋਈ ਆਮ ਗੱਲ ਨਹੀਂ ਹੈ। ਹਾਲਾਂਕਿ, ਪਿੱਛੇ ਛੱਡੀ ਗਈ ਰਕਮ ਬਹੁਤ ਵੱਡੀ ਸੀ, ਪਰ ਉਸ ਨੂੰ ਥੋੜ੍ਹਾ ਜਿਹਾ ਵੀ ਲਾਲਚ ਨਹੀਂ ਹੋਇਆ। ਉਸ ਨੇ ਬਿਨਾਂ ਕਿਸੇ ਝਿਜਕ ਦੇ ਇਮਾਨਦਾਰੀ ਨਾਲ ਰਕਮ ਪੁਲਿਸ ਨੂੰ ਸੌਂਪ ਦਿੱਤੀ।
ਜਦੋਂ ਇਹ ਪੁੱਛਿਆ ਗਿਆ ਕਿ ਕੀ ਉਸਨੂੰ ਉਸਦੇ ਇਮਾਨਦਾਰ ਕੰਮ ਲਈ ਕੋਈ ਇਨਾਮ ਮਿਲਿਆ ਹੈ, ਤਾਂ ਉਸਨੇ ਨਿਮਰਤਾ ਨਾਲ ਜਵਾਬ ਦਿੱਤਾ ਕਿ ਉਸ ਨੇ ਕੋਈ ਆਪਣੀ ਇਮਾਨਦਾਰੀ ਦਾ ਮੁਆਵਜ਼ਾ ਨਹੀਂ ਮੰਗਿਆ ਅਤੇ ਨਾ ਹੀ ਇਸ ਦੀ ਲੋੜ ਹੈ। ਉਸ ਦਾ ਇਹ ਕੰਮ ਨਿਰਸਵਾਰਥ ਅਤੇ ਇਮਾਨਦਾਰੀ ਪ੍ਰਤੀ ਅਟੁੱਟ ਵਚਨਬੱਧਤਾ ਕਾਰਨ ਹੀ ਤੇਜ਼ੀ ਨਾਲ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ‘ਤੇ ਫੈਲ ਗਈ ਹੈ, ਜਿਸ ਨਾਲ ਦੁਨੀਆ ਭਰ ‘ਚ ਉਸ ਦੀ ਪ੍ਰਸ਼ੰਸਾ ਹੋਈ ਹੈ।
ਚਰਨਜੀਤ ਸਿੰਘ ਦੀ ਇਮਾਨਦਾਰੀ ਦੀ ਮਿਸਾਲ ‘ਤੇ ਕਈ ਪ੍ਰਤੀਕਿਰਿਆਵਾਂ ਵੀ ਆਈਆਂ, ਇੱਕ ਨੇ ਲਿਖਿਆ ਕਿ ਇਸ ਤਰ੍ਹਾਂ ਦੀ ਇਮਾਨਦਾਰੀ ਨਾਲ ਦੂਜਿਆਂ ਨੂੰ ਵੀ ਪ੍ਰੇਰਣਾ ਮਿਲਦੀ ਹੈ, ਇਹ ਇੱਕ ਬਹੁਤ ਵਧੀਆ ਸੇਧ ਹੈ। ਇੱਕ ਹੋਰ ਨੇ ਅਟਵਾਲ ਦੀ ਇਮਾਨਦਾਰੀ ਵਿੱਚ ਮੌਜੂਦ ਬਰਕਤਾਂ ਨੂੰ ਉਜਾਗਰ ਕੀਤਾ, ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ ਉਸਦੀ ਇਮਾਨਦਾਰੀ ਨੂੰ ਬਿਨਾਂ ਸ਼ੱਕ ਉਸ ਨੂੰ ਕਈ ਗੁਣਾ ਇਨਾਮ ਮਿਲੇਗਾ।
